أمي

اسألو دمي ..وسعادتي وهمي

اسألو التوفيق..والكدر والضيق

اسألو الطيب في صفاتي..والدعاء اللي في صلاتي

واسألو شهودي..الدموع اللي في سجودي

اسألوهم..واسألو دمي ..عن غلا أمي
------------------------------------------------------------------------------




ماأظن الصبح .. يدري باليالي

وماأظن الليل يعنيه الصباح

وماأظن في يوم قد زارك خيالي

وماأظنك حاسباً عمري الى راح

ياقديم الظلم مافارقت بالي

ومافي بالك لي سوى هم وجراح

لو همومي تسعدك.. زد لاتبالي

ولو معي اخطيت اطلبك السماح

تبعد دروبك اذا اقبل وصالي

ولجلك دروبي يضيق بها البراح

رغم بعد البعد جرحك هو ظلالي

كنك الرامي وفرقاك الرماح

يالغرام السجن والسجان غالي

والسجين يخاف اطلاق الصراح

لو هو في الأوراق قدر الغصن عالي

بتاخذ الاوراق اقدار الرياح

للكسر غصنك وانا يمضي بي حالي

ولضمى اورقي خلق ربي قراح

بسبقك لصبح مليت الليالي

واتركك في لليل ناسيه الصباح

----------------------------------------------------------
مساء الخير

مساء الخير..والاحساس والطيبة

مساءٍ .. مايليق الا ... باحبابي

مساءٍ غير غصن لطير يحكيبه

عن اللي مسكنه جفني واهدابي

هلا باللي احبه كثر تــعذيبه

وكثر ماهو يغيب وكثر ترحابي

حبيبي هو ولو ماقصر الغيبة

ولو عن بسمتي قد طول غيابي

اعرفه.. زين وعيتني اساليبه

عدوي يوم..ويم اقرب من اصحابي

ملكني بين ترغيبه وترهيبه

يفارقني وهو واقف على بابي

به الصادق به الغارق باكاذيبه

يبي بعدي.. ودمعه بلل ثيابي

به القسوة.. به الرقة.. به الهيبه

به الضعف القوي به نشوة اغضابي

هلاباللي يصيب العطر بالريبه

يقول العطر.. انا زايل ويبقابي

هلا باللي يقول الورد وش ليبه

من المهدى ؟..انا او هو لاطيابي

هلا باللي عجزت القى عذاريبه

هلا باللي تحبه.. كل اسبابي

مساء فاق كل الشعر ترحيبه

بجية من سكن جفني واهدابي

مساء فاض بالاحساس والطيبه

مساء..مايليق الا باحـــبابي

------------------------------------------------------------شبيه الريح ..

وش باقي.. من الآلام ..

والتجريح

وش باقي من الأحلام..

وش باقي من الأوهام..

غير إني.. ألاقي في هجيرك في..

ألاقي في ظلامك ضي..

وأوقد شمعتي في الريح

شبيه الريح..

إذا تسمح بغيب شوي..

أبجمع همي الباقي..

وأدفن صبري الذابل.. في أوراقي..

وابرجع لك..إذا باقي في نفسك شي

شبيه الريح

أنا مقدر أكدر صفوك العاصف

شبيه الريح ..

أنا من لي سوى إحساسك الجارف..

بقايا زيف أشواقي..

سما أمطار أحداقي..

شبيه الريح.. وش باقي ؟

أبي أعرف..

متي تسكن رياحك؟

وابي أعرف ..

غرورك هو متي يطلق سراحك؟

وابي أعرف..

متى تعصف..

متى تعطف..

متى تترف جراحك؟

وابي اعرف إذا باقي في بحرك..موج..

أكسر فيه مجدافي..

وأبي أعرف ..

إذا باقي في همك .. هم ..

ماشا لته أكتافي

وابي أعرف ..

إذا باقي في هالدنيا..حزن ..

مامرني واستوطن أطرافي

وابي اعرف..

إذا باقي من المعجز في هالدنيا ..

سوى ((العنقاء))..

والا ((الغول))..

والا خلك الوافي؟!!

بقايا زيف أشواقي ..

سما أمطار أحداقي..

شبيه الريح.. وش باقي ؟!!

سنيني يم..

وقلبي المركب المتعب..

وأنت الريح..

مجاديفي عذاب وهم..

وزادي الوجد والتبريح..

وصبري صبر بحاره..

بغوا في البحر محاره..

غشاهم موج.. كان من الغضب أغضب..

وكانوا للهلاك أقرب..

لولا كثروا التسبيح..

شبيه الريح..

حبيب الأصدق الأكذب..

عجزت أوصل شواطي.. طبعك الكذاب..

تعبت أنظر .. في وسط العاصفه..

قلب وشعور وعاطفه..

تعبت أجمع ألم كل الموادع..

في المواني..

واحضن أطيافك

تعبت السهد في ليل الشوارع..

والثواني ..

تنظر إنصافك..

تعبت الظلم.. واجحافك..

شبيه الريح

أنا ودي أكدر صفوك العاصف ..

شبيه الريح

أنا كني نسيت إحساسك الجارف..

بقايا زيف أشواقي..

سما أمطار أحداقي

شبيه الريح..

كيف أسألك : وش باقي ؟!

وأنا الباقي من إحساسي...

ذرته الريح



-----------------------------------------------------------------------


سمعتوا قصة مرخاي

من زمان قالوا لأخوكم مردخاي

"مردخاي هذا زمانك جاي"

شفت هالخوان قاتلهم..خذ أرضهم..اهدم منازل بعضهم..وشردهم

غير معالم ارضهم..واطمس ملامحهم ..فرقهم وتصير سيدهم
وامسك بتلمودك ودينك..وبعثر مبادئهم

وبعد ماتزرع بذور الحقد فيما بينهم..وتحصد مشاعرهم
قد ماتقدر حيد اكبرهم..رد له كامل حقوقه

واعزف على اوتار فرقتهم
واضرب أغناهم بافقرهم

حاربهم بهم..واشعل معاركهم
وبعد مايستنزفوا قوة بعض

خذ مابقى منهم ..وفاوضهم
فاوضهم على الفتات

واذا عطوك حق الفتات..رجع لهم ربعه
وســــــالمـــهم

هذي قصة مردخاي سيد الزمان الجاي
عــــاجبــــكـم

---------------------------------------------------------
النظرة الخجولة

مـا سـألتـوا صـاحـب النظـرة الخجـولـة

! .. كيـف يـسـهـرنـي ولـه وجـهٍ صبـوح

! .. كيـف يظـلـمـني وله طـهـر الطـفـولـة

.. كيـف يـفـتـنـّي وهـو دايـم يــروح

.. وكيـف أنـا ألقـى ربـيـعه فـي فصـولـه

.. دام كـذبـه صـادق وصـدقــه مـــزوح


.. لـه صـفـاتٍ تـورد العـاشــق ذهـولـه

.. مسـتـكـيـن صـامـت وكـلـّه جـمــوح

.. أصـعـب الأشـيـاء و أكثـرهـا سهـولـه

.. أغـمـض الأشـيـاء و أكثـرهـا وضــوح


.. سهـل تـغـرم بـه وصـعـب إنك تنـولـه

.. غـامـضٍ طـبعـه وواضـح فـي الجـروح

.. أسـعـد بشـوفـه ولكـن مـا أطـولـه


.. كنّـي الـوادي وهـو أعـلى السـفـوح

.. يـبتـسـم لا مـنهـم عنّـي حكـوا لـه

.. ولا حكـوا لـي عنه أعـمـاقي تـنـوح

.. لـي بقـلبـه شـيٍ لكـن مـا يقـولـه

.. ولـه بـقـلبـي كـلّ و لكـنّـي أبــوح

.. كنّـه الغيـمـه و انـا أرجـي هطـولـه

.. مـا نـزل غـيثـه ولا بـرقـه يـلــوح

!! .. مـا عـرفـتـوا ليـش تسهـرني فعـولـه

!! .. وليـه يـسكـنّـي وهـو دايـم يــروح

.. هـو يـبـيـني بـسّ أطبـاعـه خجـولـه

.. ومـا يـبـيـني أغـفـا وهـو وجهـه صبـوح

---------------------------------------------------------------------


احترامي.. للحرامي
صاحب المجد العصامي
صبر مع حنكة وحيطة
وابتدا بسرقة بسيطة
وبعدها سرقة بسيطة
وبعدها تَعدى محيطه
وصار في الصف الأمامي
احترامي.. للحرامي
احترامي.. للحرامي
صاحب المجد العصامي
صاحب النفس العفيفة
صاحب اليد النظيفة
جاب هالثروة المخيفة
من معاشه في الوظيفة
وصار في الصف الأمامي
احترامي.. للحرامي
احترامي.. للحرامي
صاحب المجد العصامي
يولي تطبيق النظام
أولوية واهتمام
ما يقرب للحرام
إلا في جنح الظلام
صار في الصف الأمامي
احترامي.. للحرامي
احترامي.. للحرامي
صاحب المجد العصامي
يسرق بهمة دؤوبة
يكدح ويملي جيوبه
يعرق ويرجي المثوبة
ما يخاف من العقوبة
صار في الصف الأمامي
احترامي.. للحرامي
احترامي.. للحرامي
صاحب المجد العصامي
صار يحكي في الفضا
عن نزاهة ما مضى
وكيف آمن بالقضا
وغير حقه ما ارتضى
صار في الصف الأمامي
احترامي.. للحرامي
احترامي للنكوص
عن قوانين ونصوص
احترامي للفساد
وأكل أموال العباد
والجشع والازدياد
والتحول في البلاد
من عمومي للخصوص
احترامي
للصوص

--------------------------------------------------------------------
فقير

فقير وعندي المال الكثير

فقير وملبسي غالي حرير

وياصاحبي الحافي الفقير

ابنشدك ابسئلك وشهو الحصير

وابسئلك وشلون انا امر وانهي

واذا حكيت قبل انتهي من كلمتي

يقاللي سم ويصير

ولاشكيت من غفلتي طول زمنها

يقاللي لاتشتكي ماخلقت الشكوى لأمير

وابسئلك وشلون انا مع كل ذا

!!!اقول عن نفسي فقير؟؟؟

ياصاحبي لاصار لضحكه ثمن

وصارو اصحابي كثيربس بثمن

والوفاء مابه وفاء الا بثمن

ابسئلك ماني فقير ؟؟؟

ولاصارت اقوالي حكم

ولاقالها غيري غدت .. حكي قديم

ابسئلك ماني فقير؟؟

ولاصرت انا مانيب انا

ولاغلطت قالو صحيح وكل شي اعمله يصبح عظيم

ابسئلك ياصاحبي ماني فقير؟

وياصاحبي ابنشدك لمن جفتني دنيتي

وابتدا الدرب الطويل الى ابد ماينتهي

وانتهي العز القديم وماكنت اظنه ينتهي

والموت بدد فرحتي .. وحطوني في قبر صغير

وحزنو علي وبكو هلي وناس من ربعي قليل

وارتاح من وجهي كثير

وبقيت وحدي في حيرتي مابه احد

لاطال عمرك ولاتحت امرك

ماغير انا وخوف ولحد وحساب قدامي عسير

وقتها ذكرت اني من زمان

يوم انه امهلني الزمان

هذا ظلمت هذا جرحت ياما كذبت

وذنوبي ماتحصي كثير

وقتها الا ندمت ونفسي كرهت

عرفت ان الله كبير وان الهلاك اصبح اكيد

واني انا مالي رجاء..ولاهروب من الدجاء

من الجحيم الا بأمل عندي وحيد

ان الله غفار ورحيم

ابسئلك ياصاحبي عني في وقتها

ماني فقير؟؟؟
-------------------------------------------------------------------
هذه بعض القصائدالمختارة من موقع للشاعر الكبير الامير عبدالرحمن بن مساعد
ولكم هذاالموقع كاملا ارجوان يعجبكم

اضغط هنا