aisrb

بسم الله الرحمن الرحيم
في البداية كنت بكتب هالموضوع بعد لقاء السعوديه و اندونيسيا .. لكن الحمد لله أجلته لين بعد قطر × الامارات .. لأنه ردود الفعل كادت تكون متشابهه ..
السالفه و ما فيها بدون ماطول .. كبش فداء الإعلام و الجمهور و الاعبين بعد كل خساره ... " المـــدرب"


السعوديه × اندونيسيا



كلنا نعرف انه الفوز السعودي كان تحصيل حاصل .. لكن الواقع على ارض الملعب كان غير و مرت فترات و قلنا يا رب تبقى تعادل .. المهم دخل الذابح و دخل هدف طرنا فيه فوق ..بعدها سمعت تحليلات من بعض القنوات و قرأت تحليلات بعض الصحف

محلل الجزيره الرياضيه قال " انجوس عرف كيف يتعامل مع المباراه و اعطيه 9 من 10 "
ا
لمحلل الثاني قال "اعطيه 8 و نص "

محلل دبي قال " المدرب عرف كيف يسير المباراه "
و اغلب الجمهور طاااار بالفوز والمدرب معا !!
سؤالي البسيط ...

اذا المباراه انتهت بالتعادل 1-1 .. وش كان موقفنا من المدرب .. ؟ ما كنا راح نحطه كبش فداء و الشاطر اللي ينهش من لحمه ؟!
ما كانت المسؤوليه كلها راح تقع على عاتقه .. رغم انه مب هو اللي انقطعت الكوره منه و تمررت و دخلت هدف في مرمانا ؟!
لكن حنا ما نفهم الا .. اذا خسرنا المسؤول الأول هو المدرب .. المسؤول الثاني هو الحكم .. و اللاعبين ملائكه تحلق في سماء الملعب و تقوم بالللي عليها 100% و زياده ..

لا تعليق

المباراه الثانيه

قطر × الامارات


بعد تعادل رائع مع المنتخب الياباني و تعادل مع المنتشي الفيتنامي ..خرجت قطر مهزومه من الامارات 2-1 و بمستوى هزيل .. خلال المباراه و بعدها .. انفلت الجمهور على المدرب ..ماخلو فيه شي .. و مب كأنه هو المدرب اللي طور الفريق في السنتين الاخيرتين !! خلاص على خساره ننسى كل شي سواه و نحطه ضحيه ..!
استشهاد بسيط على كلامي...
طفل .. ما يعرف شي عن الكوره ! يعني شدراه انه في مدرب و خطط و و .. الطفل هذا الله يسلمكم .. حكم انه ميسوفيتش ما ينفع يدرب منتخب قطر ..الله و اكبر


تفضلو .. و المذيع شايلها و مستانس ..يعني مدري وين وجهة النظر في هاللقطه ! وش الفايده .. يعني تبي تكسب استعطاف الناس ضد المدرب و الاتحاد القطري بهالطريقه ؟!؟!هذا طفل لا راح ولا جا في عالم كرة القدم .. وش يدريه انه المدرب يعرف يدرب ولا لأ... يا ناس المسأله مب طفل يرسم صوره ولا مذيع يصيح ( مذيع قناة الكاس صاح و غادر الاستوديو ) !!!!!!!!!

هذا ببساطه ان دل على شي .. فيدل على انه "تحميل المدرب المسؤوليه" شي مغروز فينا .. صغارنا يسمعونه من كبارنا ! و خلاص ينطبع في عقولهم ..


لكن الحمد لله في ناس فاهمه هالشي ...
خالد الكواري مدير المنتخبات القطرية صرح "أن اللاعبين هم من كانوا يلعبون في الملعب وليس المدرب على حد قوله مطالبا بعدم تحميل موسوفيتش أسباب الخسارة المريرة للعنابي .

وأضاف الكوري قائلا بأن المحافظة على الهدف الذي تقدم به القطريون في الشوط الأول كان مسؤولية اللاعبين ولم يكن أمره بيد المدرب أو الإداريين حسب قوله ."

و الله والنعم فيك ! يعني هدفي الامارات .. الأول من كوره مرفوعه الحبيب المدافع جالس تحت سعيد الكاس .. اللاعب قفز وارتقي و حط الكوره و الاعب جالس تحته .. واقف ؟!
الهدف الثاني يسددها اسماعيل مطر .. ترتد من الحارس .. ما في اي متابعه ! جول !
بالله عليكم في الهدفين وش دخل المدرب ..؟!

هل هي من وظايف المدرب انه يعلم اللاعب شلون يغطي على لاعب راح يدق الكوره براسه .. ولا هي من وظايف المدرب انه يقول للاعب تابع الكوره اذا طاحت من الحارس ؟!
على العموم المدرب صكهم رد عجبني جدددا .. قالهم " وألقى موسوفيتش التهمة في نهاية مؤتمره الصحفي الذي تلا المباراة على اللاعبين حيث أكد في رد على سؤال أحد الإعلاميين القطريين وسط حالة من التنرفز التي ظهرت على ملامح موسوفيتش أن بعض لاعبي المنتخب القطري لم يهمهم أصلا فوز قطر على حد وصفه .

هذا الرد الاستفزازي والذي رآه البعض مبطنا من قبل موسوفيتش أثار حفيظة الكثير من الجماهير القطرية وأجبر قناة الكأس والدوري القطرية على قطع نقل المؤتمر حتى قبل أن تترجم إجابته تلك والعودة لإستديو برنامج المجلس من جديد والذي أداره ماجد الخليفي بعد خروج الإعلامي خالد جاسم ."

___________________________

في النهاية .. بالنسبه لي انا أحمل اللاعبين 85% من المسؤوليه .. لأنهم لو يطبقون اللي يقوله لهم المدرب على ارض الملعب .. ما سار اللي سار ..

آسف على الاطاله و الاختلاف في الراي لا يفسد للود قضيه ...<< صح كذا ؟
______________________________________
* التصريحات و الصور منقوله من موقع عربي .. مدري مسموحلي احطه ولا لأ .. اذا في اي مخالفه يا مشرفين اتمنى المراسله ..

لا إلـه إلا الله

أمحو ذنوبك في خلال دقيقتين

الصفحة الرئيسية لموقع الرياضة إلى الأبد