ملقوف الساحات

صليت المغرب وعقب الصلاة رجعت لبيتنا (( طبعا وين أبذلف ماهنا الا البيت ولا عبيت ورقة إذن قبل ما أطلع يعني غصب عن عين اللي خلفوني لازم أرجع ))

المهم توني أدخل البيت الا والأهل يقولون هاه ما ودك بقهيوة مزعفرة تصمد راسك
بدال معسل الفراولة اللي ذبحت نفسك به (( لا تصدقون عاد تراي أمزح الله يعصمكم منه ومن غيره ….قولوا آمين عاد
ومع القهوة صحن سكري الوحدة منه كبر حبة الفلافل (( حشا مهوب تمر صار مضرب كيرم ))
صراحة قمت اتفقد نفسي واقول اكيد فيني شيء متغير مهيب معقول أن أحد يجي ويقول تبي قهوة ، بالعادة ينقطع صوتي ما جاني كاس موية ما بالكم بدلة قهوة
جت القهوة ومعها التمر لا وزيادة على ذلك صحن حلا قهوة (( خرت سعبولتي يوم شفته وقمت أتلمظ ))
ودارت رحى قرقعة الفناجيل وطقاق الضروس كل واحد يبي يعلج التمرة تقول بينهم ثار
وبين كل فنجال وفنجال تلميحة وبين كل فصمة وفصمة أرميها تلحينة
المهم ان كلمة السوق تردد صداها في إذني اللي كنها طباقة نيفيا
قلت إيه الدعوى مهيب لله
المهم ان السوق كان تلميحا ومع آخر فنجال صار تصريحا
قلت يالله السوق …..السوق ، ما أمداني أوافق الا وبقدرة قادر القهوة والتمر والحلا مختفية وين راحت مدري (( الله يقلع ها السوق ))

ليت ها العجلة إذا جينا نروح للعمل ، لكن السوق ولا أسرع من التجهيز لروحته
شغلت الددسن وقلت يالله توكلنا على الله ، قالوا أنت صاحي نروح لذاك السوق السنع بونيت (( أها بس دور غير الددسن ))
يمكن أسواق المعيقلية معقولة أو اويشيقر أو حلة القصمان وكل اللي يشبهون لهم نروح بددسن ، لكن غيره مش خشتك دور لنا سيارة سنعة تبيض الوجه .
طيب هذا موتري وين اجيب موتر ثاني منه (( تراي أطفر من واحد يبيع ايسكريم باسكن روبنز في حارة هنود))
لا تشتري رح استاجر سيارة زينة تطرح لمبات برج التلفزيون من زينها
رحنا لمكتب تأجير مشهور بالسيارات الزينة (( الكورلا والصني ما تشوفها عندهم ))
وقفت الونيت عندهم وحولت ودخلت والقى هاك اللبناني اللي معه لسان يلوط أذانيه
على طول أول ما قال لي عطنا بطاقة العمل (( ليه الاحراج ))
قال عندنا فياجرا وشبح وبي إم ولكزس (( مدري هي صح والا خطأ )) فتحت ثمي وعلى طول قلت وش فياقرا اللي تقول عليها ترى توني بصحتي (( قروي ما يعرف عيايير السيارات )) .
شكلي طولت عليكم وانتم تحترون بس متى أدخل السوق 
خذنا السيارة ولبقنا محلها الددسن حقنا لين نرجع كوده يحب له وحدة من ها السيارات الزينة ويتزوجها ويطلعون لنا سيارة تواجه 
عاد تخيلوا بعد الدسسن وش بيكون شكل القروي في الفياقرا (( واحد يحلم أنه يجي معه فياقرا ، ولا عمري ركبتها ))
أول في الددسن مغير اتلفت يوم ركبت الفياقرا وتوني ابلتفت الا وهاك النغزة اللي خلتني أنقز من مكاني (( استح على وجهك خلك ثقل ولا تلفت أبد خلك كنك واحد يغيب نصوص ، ترى الشخصيات ما يلتفتون للي جنبهم أبد …. أي شخصية وغترتي كنها بشت دلاله معرفطة،…ولا فوطة تمسيح حقة بوفيه …. طيب واذا كان اللي جنبي يستاهل اني أحول له مهوب التفت له وش تبوني أسوي ، طبعا أقوله في نفسي لو صرحت به كان رحت في خرايطها)
وصلنا السوق وودخلنا وش أقول وش أخلي عن اللي شفته وعن المواقف اللي حصلت (( يا زين أسواق مكة وطيبة والعويس قابلها الله ))
أدور وحدة بس عليها عباية يمكن أقول انها تشبه عبايات مال أول ما لقيت (( بغيت احط مسابقة للي يقدر يطلع لي وحدة ))
تلقى هاك العباية اللي كنها فستان تصف جميع مفاتن المرأة لا وزود على ذلك تلقى عليها هاك التطريز اللي يبين ماركتها والطرحة مطلعة راس الحرمة كنها زير مويه
ولو تشيل اللثام عن خشتها لقيته كن مقفّا مد (( المد نوع من المكاييل ) الله يهديهن ويستر عليهم
واللي يبط كبدك إن بعضهن الله يصلحهن تلقاها كل شوي فاتحة العباية على بالها تصلحها وهي بنت الذين تبي توري العالم بنطلون الجنز المحزّق اللي لابستها وخاصة إذا شافت واحد مع أهله (( كيدهن عظيم )) لكن لو كنت بلحالك لا تفكر ان ها الموقف بيحصل ) الله يهديهن ويصلحهن ، وزود على ذلك تلقى الفستان (( قصدي العباية )) مفتوح على الجنبين لحد الركبة تقريبا كنه ستارة مسرح … ((واحد عارف التفاصيل ))
لا ويجون ويحطون اللوم كله على شبابنا ، ليه طيب هم الحيطة المايلة دايم
طيب شوفوا نون النسوة وش قاعدين يسوون فيهم الله يهديهم جميع
ليش الهيئة بس جيدين على شبابنا كل شوي وما تلقى الا ها الجمس مليان درزن شباب ، طيب ليه مافيه جمس هيئة وفيه حرمة ورجلها تشيل بعد وتودي من عاشقات الأسواق ، الله يذكر هيئة جدة بالخير والا بلاش …. 

واحد من الشباب اللي أعرفهم من أهل الرياض قلت له ليه تروحون للسوق طيب ؟ الا لازم ها السوق
قال وش تبيني أسوي
رحت للحديقة قالوا عوايل
رحت للملاهي قالوا عوايل
رحت لشاليهات اليمامة قالوا عوايل

ما فيه محل أجيه إلا ولازم معك محرم (( قصدي حرمة ))
حتى إنه مرة طلع من بيتهم الصبح بالجلابية ونعال الزنوبة ((أعزكم الله بطاعته)) وراح لأسواق العزيزية القريبة منهم ، بيجيب خبز توست وجبن شرايح لأهله ، قالوا له ممنوع تقدر تجينا الساعة 12 في الليل والا رح جب أمك معك ، ليه طيب !!!؟ تراها بقالة لا راحت ولا جت .
طبعا شرت عليه وقلت كان عندكم شغالة لبسها عباية وجبها لك محرم
وبعدين من يوم تدخل شتها ظفر ولا يردها الا المجلى حق مطبخكم



قال وان رحت لمقهى أنترنت قالوا أكيد هذا مهوب مضبوط ما دخل المقهى الا عشان التشات والصور وما شابه ذلك (( ليه سوء الظن))
وان دخل قهوة يبي يقعد ويوسع صدره شوي قالوا هذا داشر ويشرب تتن وجراك ومعسل (( برضه ليه سوء الظن ))
يعني بالعربي الفصيح مافيه وسائل ترفيه يقدر شبابنا يقضي بها وقته (( شوفوا وسائل الترفيه اللي تصلح للشباب من دون تجاوز الحدود ))
أزعجونا بالمراكز الصيفية وهي زي قلتها لا إبداع ولا تجديد يعني ما هنا فرق بينها وبين الدراسة
في الأخير قلت له رح لأنهار الحاير يمدحونها ويمدحون شاطئها وخاصة صيد السمك مع غروب الشمس
والله النفس الزينة لها العالم اللي يصيدون سمك من الحاير
ذكروني بمطعم الفخار واللي حصل فيه لواحد من الربع الغالين نفسه ما تعاف شيء أبد من وهو في رابع ابتدائي

=====
معليش خرجت عن الموضوع شوي ومسكت خط الحاير ، ابوقف ونعشق الموتر في الريويس ونرجع لموضوع العبايات ومنها للثام وما تحت وفوق اللثام

خلصنا من العباية ونروح للثام اللي مستغرب إنه توه يطلع الآن مع إن محمد عبده قايله من 15 سنة أو أكثر (( طق اللثام ولا تبين لحساد ))
تجيك وحدة حاطة هاك اللثام ويدها عليه وأحيانا تنسى أو تتناسى تحط يدها فيطيح اللثام ، ولا وليته على كذا تلقاها حاطة مكياج خاص باللثام على سنقة عشرة ويمكن إنها مارة مركز الوسام قبل ما تجي للسوق .
ولا يقهرك ويبط كبدك إلا إذا دخلت محل ولقيته وحدة منهم شايلة الكلافة وناطله اللثام أو الغطوة كانها موجودة ، ومن يوم تشوفك داخل مع أهلك ترتاع وتقول : هوه رجال تغطوا يا بنات ، طيب والبائع مهوب رجال ، لا حول ولا قوة الا بالله .
وكله كوم وإذا دخلت محل خاص بالملابس اللي بالي بالكم كوم بلحاله ، تعال شف البائع بكبره يستحي وهي ما تستحي (( ترى النار حارة يا الربع محد نافعكم ))
الله يتوب علينا بس ويشملنا برحمته ولا يتكلنا على أعمالنا
ومن محل إلى محل مغير ها القروي مطامر وعورته رقبته من كثر التلفت والتقزز ، وعورني جنبي من كثر النغز كل شوي اعقل ولا تلتفت
وها الشباب مناقز برضه بس مناقز له برستيج ونظام خاص (( اللوم لا يقع كله عليهم )) هذا رقم مرصوع في عباية وهذا رقم معطيه أخوها الصغير وهذي جملة ينطلها يم وحدة وكانها ملوسنة ردت عليها بأكبر منه أو أنها ردت عليه بأحسن منها
أشياء كثيرة تحدث في ها السوق لا بارك الله في العدو
تعبت وانا أكتب كملوا الباقي أنتم عاد
والله يصلح نساء المسلمين ويلبسهم لباس الستر والعفاف
أخوف ما يخاف على هذه الأمة هي فتنة النساء
=========
أرجو إن ما أحد يزعل ولا يتضايق من ها الموضوع ،
تراي ما حاولت أطب صاروخ أو محيفرة وأغوص في العميق
لأن هذا واقعنا صراحة وكل يوم في ازدياد والشمس لا تحجب بغربال
بس خفت من إدارة الموقع إنهم يشوتني ظفر ولا يردني إلا ساحة الإقلاع اللي الظاهر ما عندهم مراقبين 
واعذروني على عدم الترتيب في الموضوع

=========

إذا احـتـدم الـجــدال فــكــن رزيــنــا
و اجـمـل فـي الـمـنـاقـشـة الـخـطـابا
فـإن حَـمَـلَ الـسـفـيـه عـلـيـك فـاجـعل
تـمـنـيــه الــجــواب لــه جــوابـا
======
=======
بيجر وجوال بس ابي فزعتكم في تسديد فاتورة الجوال
abo_abdulaziz99@hotmail.com
abo_abdulaziz2001@yahoo.com

الصفحة الرئيسية لموقع الرياضة إلى الأبد